Skip to main content
Tag

Fact Check Hausa - Centre for Democracy & Development

Shin Shugaba Buhari Ya Gana Da Shugabannin Kananan Hukumomi Biyar Na Jahar Katsina Game Da Rashin Tsaro?

By Fact Check, UncategorizedNo Comments

Tantancewar CDD: Ba Gaskiya Bane!

Tushen Magana:

A ranar Talata, 28 ga watan Yulin shekara ta 2020, masu tantance sahihancin labari na Cibiyar Bunkasa Demokaradiyya da Cigaba wato CDD sun gano wani hoto da ake yadawa cewa Shugaba Muhammadu Buhari ya gana da wassu shugabannin kananan hukumomi a jahar Katsina.

Hoton wanda aka yada a dandalin sada zumunta da muhawara na Facebook ya bayyana cewa Buhari yayi ganawar musamman da shugabannin kananan hukumomin Jibia da Safana da Faskari da Sabuwa da Danmusa dangane da lalubo hanyoyin magance rashin tsaro da ya addabi yankunansu.

Hoton ya zayyana karara cewa manufar ganawar shine samo hanyar da zata warware tare da kawo karshen kashe-kashe dake faruwa a jahar Katsinan.

Gaskiyar Magana:

Binciken da CDD ta gudanar ya gano cewa ba kamar yadda hoton da kuma bayanin dake biye dashi suka zaiyana ba, Shugaba Muhammadu Buhari baiyi kowace ganawa da wassu shugabannin kananan hukumomin jahar Katsina ba. Mutane da aka gani acikin hoton tare da Shugaba Buhari ba shugabannin kananan hukumomin Sabuwa, Safana, Batsari, Faskari k Danmusa bane.

Mutanen da aka gani suna zaune da Shugaba Buhari shugabanni ne na wasssu kasahen Afirka a lokacin da suka kai ziyara kasar Mali a ranar 23 ga watan Yulin shekara ta 2020 dan sasanta rikicin kasar, kuma an dauki hoton ne a wannan rana.

Shugabannin kasashen Afrikan da suke cikin hoton sune: Shugaba Muhammadu Buhari, shugaban kungiyar kasashen Afirka ta yamma wato Shugaba Muhammadu Issoufou na jamhoriyar Nijar, da Ibrahim Keita na kasar Mali, sauran sune Shugaba Machy Sall na Senegal, da Nana Akufo-Addo na Ghana, da Alasanne Ouattara na Code d’Ivoire da tsohon Shugaban Najeriya Goodluck Jonathan.

Binciken da CDD ta gudanar ya gano cewa an dauki hoton ne lokacin da Shugaba Buhari yake ganawa da sauran shugabannin kasashen Afirka a kasar domin lalubo hanyoyin magance rikicin siyasa dake faruwa a kasar Mali.

Kammalawa:

Hoton da ake yadawa a dandalin Facebook dake cewa Shugaba Muhammadu Buhari ya gana da wassu shugabannin kananan hukumomin jahar Katsina dangane da halin rashin tsaro dake faruwa a yankunansu ba gaskiya bane!

Hoton an dauke shine a kasar Mali a ranar 23 ga watan Yulin shekara ta 2020 kuma mutanen da Shugaba Buhari ke ganawa dasu acikin hoton wassu shugabannin kasashen Afirka ne.

CDD na jan hankali mutane da su guji yada labaran karya tare da daina yada wannan labari.

Raymond Abbas Da Akafi Sani Da Suna Hushpuppi Yana Cigaba da Zama a Gidan Yari a Kasar Amurka

By Fact Check, UncategorizedNo Comments

Tushen Magana:

A ranar Laraba, 22 ga watan Yulin shekara ta 2020, masu tantance sahihancin labari na Cibiyar Bunkasa Demokaradiyya da Cigaba (CDD) suka gano wani labari da akayita yadawa shafukan sada zumunta na zamani cewa ansaki Raymond Abbas da akafi sani da suna Hushpuppi daga gidan yari a kasar Amurka inda ake rike dashi dan jiran shari’a bisa zargin aikata zanba cikin aminci da danfara.

Labarin wanda aka yadashi sosai a dandanlin WhatsApp da sauran shafukan sada zumunta na zamani ya bayyana cewa Hushpuppi ya shaki iskar yanci daga zarge-zargen da ake masa na aikata danfara ta hanyar yanar gizo.

Zaurukan yanar gizo da yawa sun wallafa labarin, GH Gossip na daya daga cikin su

Binciken da masu tantance sahihancin labarai na CDD sun gano cewa labarin cewa ansaki Hushpuppi karya ne.

Abinda ya faru shine, Hushpuppi wanda ake zargi da aikata danfara, an canja inda ake tsare dashi ne. Hukumar binciken manyan laifuka ta kasar Amurka FBI ta sauya masa matsuguni ne daga wani gidan yari zuwa wani.

Hoton Hushpuppi da za’a iya gani daga sama acikin wannan jawabi hoto ne da aka samo shi daga shafin yanar gizo na hukumar binciken manyan laifuka ta kasar Amurka FBI an wallafa shi ne a ranar 20 ga Yulin shekara ta 2020.

Da yake jawabi dangane da batun, lauyan Hushpuppi, Gal Pissetzky ya bayyana cewa an canzawa wanda yake karewa wato Hushpuppi gidan yari ne daga inda aka fara tsare shi dan fara fuskantar shari’a.

Jaridar  Premium Times ta rawaito lauyan Hushpuppi yana cewa “ba gaskiya bane cewa ansaki Hushpuppi, kawai an canja masa gidan yari ne inda aka mayar dashi jahar California”.

A ranar Laraba, 22 ga watan Yulin shekara ta 2020, lauyan ya gayawa manema labarai cewa canjawa Hushpuppi gidan yari baya nufin sake shi.

Idan za’ iya tunawa dai a farko watan Yulin da muke ciki ne yan sanda a hadaddiyar daular larabawa ta Dubai suka café Hushpuppi bias zargin danfarar mutane ta hanyar yanar gizo daga sassa daban-daban na duniya kudade da yawan su yakai 1,926,400. Zargin dake kansa shi kadai na danfarar mutane yakai kudade da yawansu yakai biliyan 168. Anfara gabatar dashi a wata kotu da take Chicago kafin daga baya a mayar dashi California.

A halin yanzu hukumar binciken manyan laifuka ta kasara Amurka wato FBI ne ke lura da shari’ar Hushpuppi din.

Kammalawa:

Labarin da ake yadawa cewa ansaki Hushpuppi karya ne. Kawai an canjawa Hushpuppi gidan yari ne inda aka mayar dashi wani gidan yari a California inda zai cigaba da fuskantan shari’a akan zarge-zargen da suka shafi danfara.

CDD na jan hankalin jama’a das u guji yada labaran da basu da sahihanci, CDD har wayau na karfafawa mutane gwiwa da su rika tantance sahihancin labarai kafin yada su.

Kuna iya aikowa CDD labaran da kuke da tantama akansu domin tantancewa ta wannan lambar waya: +2349062910568 ko a shafin Twitter ta hanyar wannan adireshi: @CDDWestAfrica @CDDWestAfrica_H.

##AgujiYadaLabaranBogi

Shin Shugaba Buhari Ne Yafi Kowane Shugaban Kasa Yawan Mabiya a Shafin Twitter a Nahiyar Afrika?

By Fact Check, UncategorizedNo Comments

Tantancewar CDD: Ba Gaskiya Bane

Tushen Magana:

A ranar Laraba, 22 ga watan Yulin shekara ta 2020, kanfanin dallancin labarai na kasa (News Agency of Nigeria-NAN) ya rawaito cewa Shugaba Muhammadu Buhari ne shugaban da yafi yawan mabiya a shafin Twitter a jerin shugabannin Afrika.

Rahoton NAN din ya bada misali da binciken “Twiplmacy Study 2020” wanda majiyoyin sadarwa na yanar gizo dama jaridu irinsu Vanguard News, PMNews Online, Newswireng da Pulse Nigeria da All Africa sukayi anfani dashi.

Gaskiyar Magana:

Kamar yadda binciken kwakwaf ya gano wanda kuma Twitter ke anfani dashi (Twiplamacy) wajen tantance masu yawan mabiya ya zayyana cewa shugaban kasar Masar wato Abdelfattah Elsisi (@AlsisiOfficial) shine shugaban da yafi yawan mabiya a shafin na Twitter a jerin shugabannin Afirka. Yana da mabiya 4,133,263 yayin da Shugaba Buhari (@MBuhari) ke da mabiya 3,121,169

Rahoton Twiplamcy din ya zayyana cewa Shugaba Muhammadu Buhari shine shugaban da yafi yawan mabiya a Twitter a yammacin Afrika amma ba’a fadin Afirka baki daya ba. Rahoton Twiplomacy din da NAN tayi anfani dashi ya zayyana bayanan sa karara.

A screenshot of a cell phone
Description automatically generated

Wani bangare na bincike twiplomacy di yace: “Muhammadu Buhari, shugaban kasar Najeriya shine shugaban da yafi kowane shugaba dake kudancin Sahara a nafiyar Afirka yawan mabiya a shafin Twitter, Buhari yana saman Paul Kagame, shugaban kasar Rwanda da mabiya 1,910,159”.

Akwai kasashe 46 a kudancin Sahara daga cikin kasashe 54 dake nahiyar Afirka. Kasashen Masar, Libiya, Maroko, Somalia, Sudan, Algeria, Djibouti da Tunisia basa cikin jerin kasashen dake kudancin Sahara.

Kudancin Sahara a nahiyar Afirka yana nufin kasashen da kudu da Sahara.

Kammalawa:

Labarin da ake yadawa cewa Shugaba Muhammadu Buhari shine shugaban da yafi kowane shugaban kasa a nahiyar Afirka yawan mabiya a Twitter ba gaskiya bane.

Shugaban kasar Masar wato Abdelfattah Elsisi (@AlsisiOfficial) shine yafi kowane shugaban kasa a nahiyar Afirka yawan mabiya a shafin Twitter, yawan mabiyan sa yakai 4,133,263 kawo karfe goma na safiyar ranar 23 ga watan Yulin shekara ta 2020.

CDD tana karfafawa yan jarida dasu rungumi dabi’ar yin binciken kwakwaf akan labari kafin wallafa shi.

Shin Da Gaske Ne Za’a Gudanar Da Jarabawa Ta Hanyar Yanar Gizo Ga Wadanda Suka Shiga Tsarin N-Power Agro?

By Fact Check, UncategorizedNo Comments

Tantancewar CDD: Karya Ne!

Tushen Magana:

A ranar Alhamis, 9 ga watan Yulin shekara ta 2020, masu tantance sahihancin labari na Cibiyar Bunkasa Demokaradiyya Da Cigaba wato (CDD) suka gano wani sako da ake bazawa ta manhajar WhatsApp inda ake sanar da wadanda suka nemi shiga tsarin N-Power Agro game da wata jarabawa da za’a gudanar musu ta yanar gizo.

Kamar yadda sakon ya bayyana, an aikawa dukkan wadan da sukayi nasarar shiga cikin tsarin na N-Power Agro. Sakon ya kara da karfafawa wadanda suka shiga cikin tsarin da su duba imel dinsu dan samun adireshin yanar gizon da zasuyi anfani dashi dan yin jarabawar.

Sakon wanda aka yadashi sosai ta manhajar WhatsApp yayiwa mutane jawabi kamar haka: “ku taimaka ku gayawa wadanda suka nemi shiga cikin tsarin N-Power Agro na Ma’aikatar Noma da Raya Karkara da su gaggauta duba imel dinsu dan samun bayani game da jarabawa da za’a yimusu kuma wannan jarabawa zata dauki tsawon minti 15 , ku yada wannan sako dan yakai ga wadan da abun ya shafa”.

Gaskiyar Magana:

Binciken da masu tantance sahihancin labarai na CDD suka gudanar ya gano cewa babu wata sanarwa ko sako da gwamnatin tarayya ta bayar game da yiwa wadanda suka shiga cikin tsarin N-Power wata jarabawa ta hanyar yanar gizo. Hakanan shafin yanar gizo N-Power ko kafafen sada zumunta na N-Power duk basu bada wata sanarwa ko sako mai kama da haka ba.

Fake News Alert! 5 Steps to Verify Every Information on CDD Channel

A jawabi da ma’aikatar jinkai da bada dauki ta fitar a ranar 7 ga watan Yulin shekara ta 2020 ya nuna cewa babu wata sanarwa da gwamnatin tarayya ta bayar game da tsarin na N-Power.

Dan fitar da gaskiyar lamari game da batun, shirin N-Power ya bada ba’asi dan magance jita-jitar da ake yadawa. Har wayau shirin N-Power yaja hankali jama’a da cewa su guji daukan duk wata sanarwa da bata fito daga amintattun kafafen sadarwa da shirin N-Power yake anfani dasu ba.

Kammalawa:

Labarin da ake yadawa cewa za’a gudanar da jarabawa ta yanar gizo ga mutanen da suka shiga cikin shirn N-Power Agro karya ne.  Ma’aikatar jinkai da bada dauki ta gargadi mutane da cewa su guji daukan duk wani labari game da shirin N-Power da bai fito daga sahihiyar majiya ba.

CDD tana jan hankali jama’a da su rika tantance sahihancin labari kafin yadashi tare da daina kirkira ko yada labaran karya.

Kuna iya turowa CDD labaran da kuke da tantama akansu dan tantancewa ta wannan lambar: +2349062910568 ko shafin mu na twitter: @CCDWestAfrica, @CDDWestAfrica_H

#AdainaYadaLabaranKarya

Shin Wassu Kwararru a Najeriya Sun Gano Maganin Cutar Corona?

By Fact Check, UncategorizedNo Comments

Gaskiyar Magana: Hakan Bai Tabbata Ba!

Tushen Magana:

A satin da ya gabata majiyoyi da yawa musamman a yanar gizo sun wallafa wani labari dake cewa wassu masana kimiyya a Najeriya sun gano maganin cutar Corona.

Daya daga cikin wadannan majiyoyin mai suna Nigerian Guardian ta wallafa wani labari mai taken: “masana kimiyya a jami’o’in Najeriya sun samo maganin cutar Corona”.

Wannan labari an wallafa shi sosai acikin Najeriya kai harda ma wassu kafofin yada labarai na kasahen ketare.

Gaskiya Magana:

Kawo yanzu babu masani ko gungun masana a Najeriya da suka kai gano maganin cutar Corona. Kodayake, a ranar 19 ga watan Yunin shekara ta 2020, kungiyar masana da manazarta kimiyya a Najeriya a karkashin bincike akan cutar ta Corona wanda Dr Oladipo Kolawole na jami’ar Adeleke, Ede dake jahar Osun sun bayyana cewa suna da wani magani da suke tunanin za’a iya anfani dashi dan magance Corona. Sun bayyana hakan ne a lokacin da suke yiwa yan jarida bayani game da batun.

Manema labarai da yawa sunyi riga malam masallaci wajen bayyana cewa wadannan gungun masana sun gano maganin cutar Corona duk kuwa da yake basu fadi hakan ba, abinda kawai suka fada shine cewa suna da wani magani da suke tunanin zai iya magance Corona.

Kolawole, wani kwararren likita ne kuma ya bayyana cewa suna tukuru dan samo maganin cutar Corona a fadin nahiyar Afirka. Ya kara da cewa a halin yanzu suna da wassu sinadarai da suka aminta cewa zasu iya tai akawa wajen magance cutar amma za’a gudanar binciken kwakwaf dan tantance su.

A wani rahoto da aka wallafa a ranar 23 ga watan Yunin shekara ta 2020 Farfesa Olubukola Oyawoye wanda shine shugaban sashin nazarin kimiyya na jami’ar Adeleke University ya gaywa  BBC Pidgin cewa ikirarin da akeyi cewa masani kimiyya na jami’a sun samo maganin cutar Corona bah aka bane.

Oyawoye ya kara da cewa abinda taron manema labaran da akayi ya bayyana shine ana cigaba da gudanar da bincike game da neman maganin.

Har wayau a wani rahoto da hukumar lafiya ta duniya WHO ta wallafa awatan Yunin shekara ta 2020 COVID-19 candidate vaccines landscape, hukumar lafiyar tace kawo yanzu akwai magunguna guda 129 a fadin duniya baki daya da suke matakin tantancewar kwakwaf bisa matakin binciken magani kuma wannan adadi baya dauke da maganin da ayarin likitocin jami’a Adeleken.

Yaddan Ake Samar da Magani

Samar da magani abune da ya ta’allaka da bin wassu matakai da kuma gwaje-gwaje wadanda ake aiwatar dasu a matakai daba-daban saboda tantance inganci da illolin da suke dasu ga dan’adam dan dakile illolin in akwaisu. A wani kaulin yakan dauki shekaru kafin akai ga samar da magani saboda masana da masu bincike kan sadaukar da lokaci dan fahimtan abubuwa da yawa.

A wani martani da tayi, hukumar lafiya ta duniya World Health Organisation (WHO) a watan Afirilun wannan shekara tace samar da magani da ka iya magance cututtuka yakan dauki lokaci mai tsawo kafin a samar dashi, an iya samar da maganin da ka iya tasiri ga annoba da ka iya faruwa kuma samar da irin wannan magani zai taimaka musamman ga annobar da ake fama da ita.

WHO tace “adaidai wannan lokaci abin a yaba ne irin matakan dakatar da yaduwar cutar Corona da al’ummomi daban-daban ke dauka da aiwatarwa da suka shafi bada kariya ga dukkan mutane da sauran jama’a masu rauni acikin al’umma. Wannan abune mai kyau yayin da yunkurin samar waraka ga cutar ke cigaba”.

Kammalawa:

Ayarin masu bincike akan cutar Corona na Jami’ar Adeleke basu kaiga samo maganin cutar Corona ba, matsayar da suka cimma itace sun samu wani sinadari da za’a iya anfani dashi akan cutar amma wanna ya ta’allaka da tantancewar binciken lafiya.

CDD tana jan hankalin mutane dasu rika karanta gundarin labari dan gano abinda ya kunsa ba kawai a tsaya daga abinda jigon labarin ya fada ba.

#AdainaYadaLabaranKarya

Shin Kanfanonin Apple da Google Sun Samar Manhajar Da Zata Bi Diddigin Cutar Corona a Asirce a Wayoyin Mutane?

By Blog, Fact Check, UncategorizedNo Comments

Tantancewar CDD: Labari ne na bogi!

Tushen Magana:

Mutane da yawa a Najeriya dake anfani da manyan wayoyi suna ta bayyana shakku da cece-kuce dangane wata magana dake yawo cewa daya daga cikin kanfanonin nan guda biyu, wato Apple ko Google ya jefa wata manhaja da zata rika bin diddigin bayanan da suka shafi cutar Corona ba tare da izinin masu wayoyin ba. Wannan magana tayi yawo sosai a kafafen sadaarwa na zamani irinsu WhatsApp da Facebook da Twitter. Kamar yadda bayanin dake kunshe acikin maganara ya bayyana, wannan manhaja an kirkire ta ne dan liken asiri ga mutane.

Gaskiyar Magana:

A baya-bayannan kanfanin Google ya kara wata fasaha akan jerin fasahohin da yake anfani dasu, fasahar wadda take da taken: “bayanai akan cutar Corona”, wannan jimla takan bayyana daga mutum ya shiga runbun takaitattun bayanai  a manhajar Google akan wayar sa ko wayarta da Android, yadda hoton shafin ke kasancewa kamar yadda wannan hoto na kasa ke nunawa.

Ba’a samar da sabon runbun takaitattun bayanan dan liken asiri ga mutane ba ko wani abu da ya shafi cutar Corona kamar yadda wassu sakonni da suka bayyana ta kafafen Facebook da Twitter dama WhatsApp suka yayata.

Kanfanin Android ko IOS suna anfani da tsari ne dake bada damar saka manhajoji da yawa akan waya ko na’ura daya. Kamar tsarin da yadda sauran manhajoji da tsare-tasren da suka kan wayoyi da na’urori, abinda kanfanin Apple da Gooogle sukayi shine sabunta tsare-tsaren su dan kyautata yadda wayoyin zasu yi anfani da kuma barin sauran manhajoji suyi aiki idan kowane mai waya ya dora akan wayar sa ko wayar ta.

Kamar yadda jadawalin kirikirar manhajar da kanfoanonin Apple da Google din ta zaiyana, mutane suna da zabin dora manhajar akan wayoyin su tare da damar amincewa ko rashin amincewa da dora manhajoji a wayoyinsu, kamar dai yadda dora sauran manhajoji yake daga runbun manhajoji na app store.

Sabon runbun bada sanarwa ko bayanai game da cutar Corona din bazai yi aiki a waya har sai ansaka shi a waya kuma kawo yanzu wannan tsari bazai yi aiki a waya ba saboda kirkirar manhajar bai kan kama ba, dan batun saka shi a waya ma bai taso ba.

Bayanan da masa tantance sahihancin labarai na CDD ke dasu kawo yanzu sun nuna cewa gwamnatin Najeriya bata sanar da samar da manhajar bin diddigin bullar cutar Corona ba.

Babban lura da sashin dake kula da jita-jita na cibiyar dakile yadiwar cutuka ta kasa NCDC, Abiola Egwuenu yace cibiyar bata da manhajar bin diddigi.

Egwuenu ta kara da cewa manhajar kawai da cibiyar ke anfani da ita itace ta gano bulla da alkintawa tare da bada sharfi akan annoba da aka yiwa lakabi da SORMAS a turance.

Egwuenu tace wannan manhaja da suke anfani da ita manhaja ce data shafi bangare lafiya dake anfani a wayoyin hannu wadda kuma take tallafawa wajen gano bullar annoba kai tsaye ta hanyar hange a fasahar zamani da dakuna gawje-gwajen lafiya.

Ta ci gaba da cewa bayanan da wannan mahaja ke tattarawa ana samun su ne ta hanyar jami’an gwamnati a matakin jaha da kananan hukumomi wadanda aka basu damar yin anfani da ita manhajar.

Kammalawa:

Kanfanonin Google da Apple basu sakawa wayoyin mutane wani tsari dazai rika tattara bayanai game cutar Corona ba. Abinda kawai sukayi shine fadada yadda jadawalin yadda tsarin su ke aiki dan bada dama ga manhaja tayi aiki wanda kuma hakan ke nufin kowane mutum na iya saukar da manhaja da kowa ne runbun manhajojin da yake anfani dashi.

Idan mutum ya saukar da manhaja wadda hukumomin lafiya suka samar, kamar a Najeriya hukumar dakile yaduwar cututtuka ta kasa NCDC da ma’aikatar lafiya ta tarayya, za’a bukaci izininka ta fuskoki daban-daban dan baiwa manhajar damar yin aiki yadda ya kamata.

#AdainaYadaLabaranBogi

Minista Sadiya Farouk Bata Ce Yan Arewacin Najeriya Masu Karamin Karfi Ne Kawai Zasu Samu Tallafin Gemanitin Tarayya Ba

By Fact CheckNo Comments

Jita-Jitar Da Ake Yadawa:

Wani sako da ake yadawa ta shafin Instagram yace Ministan Bada Dauki da Jinkai Sadiya Farouk tace masu karamin karfi yan arewa ne kawai suka cancanta su samu tallafin gwamnatin tarayya ta hanyar banki da za’a raba a wannan lokaci da ake kokarin yakar Cutar Corona. Labarin bogin da aka wallafa yana dauke da hoton ministan kuma angina labarin da jigo kamar haka “zamu raba tallafin kudi na gwmnatin tarayya ga yan arewa talakawa ne kawai saboda babu talakawa a kudancin Najeriya”.

Gaskiyar Magana:

Wannan labari da ka’iya tunzura mutane kuma marar tushe bashi da madogara. Idan za’a iya tunawa, ministan tayi jawabi a ranar Litinin da Talata wato 30 da 31 ga watan Maris, 2020 a lokacin da take tare da sauran mambobin kwamitin gwamnatin tarayya akan Cutar Corona, a lokacin jawabin, Sadiya Farouk tace yan Najeriya masu rauni dake jihohi 36 da babban birnin tarayya Abuja sune zasu samu tallafin gwamnatin tarayya ta hanya tura musu kudi ta banki.

Tallafin gwamnatin tarayyar zai shafi iyalai masu karamin karfin ne a duk fadin Najeriya ba tare da bada kulawa ko fifiko ga wani yanki ba. An samar da wani jadawali da za’a samar dashi a dukkan jihohi dan tattara bayanan wanda suka cancanta su samu tallafin, kuma da wannan jadawali ne za’ayi anfani wajen aiwatar tsarin tallafin.

Kammalawa:

Jita-jitar da ake yadawa cewa gwmantin tarayya zata raba kudi ga yan arewancin Najeriya dan rage musu radadin rayuwa musamman a wannan lokaci da ake yakar Cutar Corona labari ne na bogi. Cibiyar Bunkasa Demokaradiyya da Cigaba wato (CDD) tana jan hankali ga yan Najeriya da suyi watsi da wannan labari da ka’iya tunzura mutane da kuma kira da adaina kirkira ko yada labaran karya.

5G Bashi Da Alaka Da Cutar Coronavirus

By Fact CheckNo Comments

Gaskiyar Magana: Binciken da CDD ta gudanar ya gano cewa wannan jita-jitar da ake yadawa cewa 5G yana haifar da Cutar Corona labari ne na Bogi!

Tushen Magana: adaidai lokacin Cutar Corona ke cigaba da yaduwa, masu tantance sahihancin labarai na Cibiyar Bukasa Demokaradiyya da Cigaba wato Centre for Democracy and Development (CDD) suna cigaba da aikin su na bin diddigin labaran karya dan gano tushen su ba-dare-ba-rana.

Misali, daya daga cikin wadannan labarai marasa tushe shine wani kirkirarren batu da ya janyo cece-kuce da muhawara, wannan batu ba wani bane face “maganar da ake tafka muhawara akanta cewa akwai alaka tsakanin 5G (sabon tsarin saurin anfanin da yanar gizo) da kuma Cutra Corona ko COVID-19”.

Masu anfani da shafin sada zumunta Facebook a fadin duniya suna ta wallafawa tare da yayata maganganu cewa wannan tsari na saurin anfani da yanar gizo na 5G shine ke sa mutane kamuwa da cuta amma ba Cutar Corona ko COVID-19, kuma mutane da dama sun mutu sakamakon illar da tsari na 5G ke haifarwa.

A Najeriya, tsohon Sanata mai wakiltan jihar Kogi Ta Tsakiya,  Dino Melaye yayi zargin cewa bincike ya nuna Cutar Corona ba ita bace kalubalen da duniya ke fuskanta ahalin yanzu. Melaye a wata magana da wallafa a ranar Asabat  4 ga watan Afirilun, 2020, yace, daga binciken da ya gudanar, Cutar Corona ba ita bace matsala ba a yanzu. Babbar matsalar itace wannan tsarin na 5G da ake ta jinkirin gabatar dashi.

Sanatan ya fitadda maganganu dan kara tabbatar da zargin sa da suka hada da bada jawabi ga yan jaridu inda yace kanfanin MTN Nigeria sun sanar da gwaji da zasuyi na wannan tsari na 5G a Najeriya.

Har yanzu dai akan batun 5G din, tsohon Ministan Sufurin Jiragen Sama Femi Fani-Kayode da Shugaban Majami’ar Christ Embassy, Fasto Chris suma sun jaddada jita-jita. Fani Kayode da Fasto Chris sun alakanta Cutar Corona da 5G inda sukace wannan wata makarkashiya ce ta gabatar mulkin mallaka na kasashe masu karfi.

Har wayau, daga 23 ga watan Maris zuwa 4 ga watan Afirilun 2020, akwai muryoyi da dama da aka nada kuma aka yada ta manhajar WhatsApp da sauran kafafen sadarwa ana yada wannan magana marras tushe.

Gaskiyar Magana: 5G baya kawo Cutar COVID-19. Akwai nau’i guda biyu da 5G yake dasu. Na farko shine “sub-6 GHZ” wanda nisan zangon sa yana kasa da ma’auni na 6 GHz. Na biyun shine “millimeter wave” shi kuma nisan zangon sa ya wuce ma’aunin “24 GHz”. Su sunadaran sub-6 GHz bawai kwata-kwata basu da alaka da 5G da 4G bane. Wi-fi da microwaves suna aiki ne da sinadarin sub-6 GHz.

Masu manufar jirkita fahimtar mutane game da 5G sunyi anfani da kaddamarwa da kuma gano wannan tsari a kasar China a matsayin hujjar su. Amma 5G din kasar China yayi anfani ne da sub-6 GHz. Haka huma microwave din muke anfanin dashi anan bai haifar mana da Cutar Corona ba a duk tsawon shekarun da mu dauka muna anfani dashi, saboda haka 5G bazai haifar mana da Cutar Corona ba. Hasali ma, bai kamata muyi tunanin fuskantar rashin lafiya ba sakamakon anfani da 5G.

A wani jawabin da ta fitar a shafinta na yanar gizo akan wannan batu, hukumar lafiya ta majalisar dinkin duniya WHO tace: “bayan gudanar da baincike mai zurfi, kawo yanzu babu wata matsananciyar rashin lafiya da mu’amala da na’urori da za’a iya sarrafa su ba tare da kulla waya ba” zasu haifar. WHO ta kara da cewa zata cigaba da nazarin bincike-binciken da ake gudanarwa a wannan bangaren kuma zata wallafa sakamako dangane da batutuwan lafiya da suka shafi zangon sadarwa na waya a shekata 2022.

Hukumar lafiyar ta duniya ta kara da cewa abinda yake samar da hulda tsakanin jikin dan’adam da zangon sadarwa shine dumama da ka’iya faruwa. Hakanan hukumar lafiyar ta cigaba da cewa yadda ake ta’ammuli da na’urori a yanzu baya haifar da wani yanayi da ka’iya zama matsala ga jikin dan’adam.

WHO tace babu wata barazana ga lafiyar al’umma indai har ta’ammulin yana kan ma’auni mafi karanci da kuma sharudan kasa da kasa.

Game da Cutar COVID-19, WHO da hukumar dakile cutuka ta Najeriya NCDC sunyi ittifakin cewa cutar ta samo asali ne daga dabbobi kafin yaduwar ta zuwa dan’adam.

A wani martani da ya mayar cikin gaggawa, Ministan Ma’aikatar Sadarwa da Tattalin Arziki Ta Fannin Sadarwa, Dr. Isah Ali Ibrahim Pantami ta cikin takarda da aka rabawa manema labarai a ranar 4 ga watan Afirilu shekara ta 2020, yace ba’a bada lasisi ko umarnin kaddamar da tsarin 5G a Najeriya ba. Dr. Pantami ya cigaba da cewa an bada izinin gwajin tsarin na 5G na tsawon watanni uku kuma gwajin ya fara aiki tun ranar 25 ga watan Nuwanba shekara ta 2019, kuma anyi hakanne dan gano cewa ko tsarin yana da illa ga lafiya ko al’amarin tsaro a Najeriya.

Minista Pantami yace: “a matsayin gwaji, na umarci ma’aikatar kula da harkokin sadarwa wato Nigeria Communications Commission (NCC) da su tabbatar da cewa ayarin kwararru, masana tsaro da dai sauran masu ruwa-da-tsaki sun shiga cikin wannan lamari na gwaji, hakanan ofishina ya gayyaci duk wadanna hukumomi na gwamnati dan suma su shaida yadda wannan gwaji zai kasance, ahalin yanzu, gwajin ya kankama, ana cigaba da yin nazari akan sakamakon gwajin kuma ana cigaba da rubuta rahoton”.

Kammalawa:

Babu wani sahihin bincike da ya tabbatar da alaka tsakanin samar da 5G da annobar Cutar Corona ko COVID-19. Hakanan kuma babu kanfanin sadarwa a Najeriya da yake gabatar da ayyukan akan tsarin 5G saboda har yanzu gwamnati bata bada umarnin yin hakan ba. CDD tana jan hankalin mutane da su guji daukar farfagandar da wassu sanannun mutane ke yadawa akan wannan al’amari.